ფილმი მნახველს არტისტის ჩინეთში მოგზაურობაში ეპატიჟება, სადაც იგი გამოქვაბულების შესასწავლად წავიდა. გამოქვაბულები არტისტის აზრით, ადამიანის გონებას გავს. ჩინურად სიტყვა გამოქვაბული ითარგმნება როგორც სამოთხის ორმო; ეს მოულოდნელი ასოციაციაა, როცა სამოთხე არა ცას, არამედ მიწას უკავშირდება. ამ ასოციაციამ არტისტის ცნობისმოყვარეობაც გაამძაფრა და გააძლიერა მოგზაურობის სურვილი.
ფსევდო-სამეცნიერო ექსპერიმენტის კვლევაში ლარა უამრავ ჯადოსნურ პეიზაჟს შეხვდა, რომელიც ფილმშია ასახული. ეს ადგილები ისეთი მშვიდია, რომ მედიტაციურ განზომილებაში გადაჰყავს მნახველი. ფილმში ულამაზესი ხედები იჭრება კანტონის ოპერის, სალოცავი ბორბლების და სხვა ობიექტების კადრებით; რომლებიც დანახვისთანავე აღმოსავლეთ აზიასთან ასოცირდება. ამასთან, ეს სიმბოლოები მხატვრის პერსონალურ გამოცდილებას ასახავს და არ აღიქმება როგორც კლიშე. ორიენტალური მუსიკალური მოტივები გადაიქცევა მარტოობის ოდად, ჩვეულებრივი მოძრაობები იკითხება რელიგიურ ჟესტებად და ხელთათმანი მაგიურ სამოსად გვევლინება.
ლარა განათლებით მხატვარია და დაინტერესებულია ფილმისა და მხატვრობის კავშირების ძიებით. მისი ფილმები გაჯერებულია მხატვრული ხედვით; თითოეული კადრი ფრთხილად არჩეული კომპოზიციის, ფერისა და განლაგების შედეგია.


ლარა სმითსონი სწავლობდა სლეიდის ხელოვნების აკადემიაში 2011-2015, ლონდონი, საიდანაც გაცვლითი პროგრამით სასწავლებლად, ნიუ იორკში, Cooper Union -ში წავიდა. ბაკალავრიატის დასრულების შემდეგ, ლარამ მიიღო Dolbey-ის სამოგზაურო გრანტი, რომლის დახმარებითაც, ის 2016 წელს, 4 თვის განმავლობაში, ჩინეთსა და ვიეტნამში მოგზაურობდა. ლარა დაჯილდოებულია Claire Winston Memorial Award-ით 2015 წელს და the Grocers Company Queen’s Golden Jubilee Award-ით 2011-15 წლებში.