საბჭოთა ცისარტყელა-მაღაზიიდან მუზეუმამდე - ნინო ქვრივიშვილის სოლო გამოფენა აბრეშუმის სახელმწიფო მუზეუმში, კურატორი: ირინა პოპიაშვილი. 

გამოფენა “საბჭოთა ცისარტყელა - მაღაზიიდან მუზეუმამდე” მუზეუმის ისტორიის, ქართული აბრეშუმისა და ქსოვილების ინდუსტრიის თემაზეა შექმნილი. პროექტის შინაარსიდან გამომდინარე, გამოფენის კურატორმა, ირინა პოპიაშვილმა, ავტორის ნამუშევრები მუზეუმის დროებით საგამოფენო სივრცესა და მუდმივმოქმედ ექსპოზიციაში განათავსა.

გამოფენის სათაური „საბჭოთა ცისარტყელა“ ეხმიანება თბილისის აბრეშუმის ფაბრიკის სახელს და ამჯერად, თითქმის შეწყვეტილი ინდუსტრიის ნაწარმი არტისტის ნამუშევრებით ახალ კონტექსტში წარმოგვიდგინა. კონცეპტუალურად ნინო ქვრივიშვილის გამოფენა აბრეშუმის მუზეუმის საზღვრებს გარეთაც გრძელდება. არტისტის გამოფენის ბანერები ქალაქში განთავსებულია იმ ადგილებზე, სადაც 25 წლის წინ თბილისელებისთვის ნაცნობი ქსოვილების მაღაზიები იყო. ამგვარი ხერხით, ნინო ქვრივიშვილმა წარსული და აწმყო ემოციურად დააკავშირა და თბილისელებს კიდევ ერთხელ შეახსენა ის ადგილები, სადაც უფროსი თაობის ადამიანებისთვის ნაცნობი და საყვარელი მაღაზიები იყო განთავსებული. გამოფენა „საბჭოთა ცისარტყელა - მაღაზიიდან მუზეუმამდე“ იმ მოსახლეობას მიმართავს, რომლისთვისაც ქალაქის უახლესი ისტორიის ანთროპოლოგიური რუკა, პირადი ცხოვრებისა და მეხსიერების ნაწილია. ახალგაზრდა არტისტმა საბჭოთა პერიოდში თბილისის ფაბრიკის გამოშვებული ქსოვილები მოიძია და ისინი მუზეუმის რეკონსტრუქციის შედეგად გადარჩეულ ნივთებთან კომბინაციით ახალ კონტექტსში, ახალ ნამუშევრებად წარმოგვიდგინა. ნინო ქვრივიშვილის “ლედი შავ კაბაში” ძველ ოვალურ მუყაოს ჩარჩოში ჩასმული პორტრეტია, ხოლო ლედის პორტრეტი საბჭოთა ცისარტყელის “კრეპდიშინია”.

ნინო ქვირივიშვილი ბევრი გამოფენის მონაწილეა. მისი გამოფენებიდან აღსანიშნავია პერსონალური გამოფენა Gallery MelikeBilir, ჰამბურგი, გერმანია; KKKC, კლაიპედა, ლიტვა; ჯგუფური გამოფენა 21-ე საუკუნის ქართველი არტისტები, Popiashvili Gvaberidze Window Project-ში. ნინო ქვრივიშვილი იყო Achterhaus რეზიდენციაში ჰამბურგში და KKC-ის რეზიდენციაში კლაიპედაში; 2016 წლის ოქტომბრიდან არტისტი ციურიხის ბინცის რეზიდენციაში მიიღებს მონაწილეობას.

პროექტი ხორციელდება “სამხრეთ კავკასიის ხელოვნებისა და კულტურის რეგიონული პროექტის”ფარგლებში. პროექტის მართვას უზრუნველყოფს კულტურისა და მენეჯმენტის ლაბორატორია სამხრეთ კავკასიის შვეიცარიის თანამშრომლობის ოფისის (SCO) ფინანსური მხარდაჭერით.